অসম

অসমৰ বিভিন্ন স্থানৰ দৃশ্য

অসম (ইংৰাজী: Assam) ভাৰতৰ উত্তৰ-পূবত অৱস্থিত সাংস্কৃতিক আৰু ভৌগোলিকভাৱে এখন পৃথক ৰাজ্য। ১৮২৬ চনৰ ইয়াণ্ডাবু সন্ধি অনুসৰি অসম ইংৰাজৰ হাতলৈ যায়। ভাৰতৰ স্বাধীনতা আন্দোলনত আন প্ৰদেশৰ নিচিনাকৈ অসমৰ জনসাধাৰণেও গুৰুত্বপূৰ্ণভাৱে অংশগ্ৰহণ কৰে আৰু ভাৰতবৰ্ষ স্বাধীন হোৱাৰ পিছত অসম স্বাধীন ভাৰতৰ এখন অন্তৰ্গত প্ৰদেশ হিচাপে গঠিত হয়। ব্ৰিটিছ-শাসিত ভাৰত আৰু আধুনিক কালতো অসম এখন মুখ্য প্ৰদেশ আছিল, কিন্তু পিছলৈ এই অঞ্চল বিভিন্ন ৰাজ্যত বিভক্ত হয়। অসমৰ ৰাজধানী হৈছে দিছপুৰ। অসম ব্ৰহ্মপুত্ৰ আৰু বৰাক উপত্যকাৰ লগতে কাৰ্বি আংলং আৰু উত্তৰ কাছাৰ পৰ্বতক সামৰি ৩০,২৮৫ বৰ্গমাইল (৭৮,৪৩৮ বৰ্গ কিলোমিটাৰ) জুৰি আছে। অসমক সাত ভনীৰ বাকী ছয়খন ৰাজ্য অৰুণাচল প্ৰদেশ, নাগালেণ্ড, মণিপুৰ, মিজোৰাম, ত্ৰিপুৰা, আৰু মেঘালয়ে আৱৰি আছে। আনহাতে অন্য এখন ৰাজ্য পশ্চিমবংগ অসমৰ লগত সংযোগ হৈ আছে। অসম ভূটান আৰু বাংলাদেশৰ সৈতে আন্তঃৰাষ্ট্ৰীয় সীমাৰে যুক্ত হৈ দক্ষিণ-পূৱ-এছিয়াৰ বিভিন্ন সাংস্কৃতিক সমল আহৰণ কৰিছে। কাজিৰঙাৰ এশিঙীয়া গঁড়, চাহ, মুগা আদিৰ বাবে অসম পৃথিৱী বিখ্যাত।

উদ্ধৃতিসমূহ

• অসম এখন সুশোভন বননিৰ দেশ। এই দেশৰ কিছুমান নদীৰ সৌন্দৰ্য ইমানেই মোহনীয় যে পৃথিৱীৰ আন কোনো সৌন্দৰ্য‌ই ইয়াক চেৰ পেলাব নোৱাৰে। টেমছ নদীৰ মোহনীয় ৰূপ ম‌ই দেখিছোঁ। কিন্তু প্ৰকৃতিয়ে অতি বিলাস-বহুলভাৱে সজাই তোলা যি নিজৰাৰ পাৰত বহি ম‌ই এই টোকাবোৰ লিখি আছো তাতকৈ ওখ খাপৰ সৌন্দৰ্য ক’ৰবাত দেখা মোৰ মনত নপৰে।
  • মহাত্মা গান্ধী
• মোক স্বৰ্গ নালাগে, বৈকুণ্ঠ নালাগে; সুজলা-সুফলা অসমভূমিতে মই বাৰে বাৰে জনম ল’ম৷
  • পিয়লি ফুকন
• অসমখন যেন এখন ধোবাই কাপোৰ ধোৱা পাটহে৷ যাৰ যি ইচ্ছা তাকে কৰিছে৷ কাৰোবাৰ ইচ্ছা হৈছে ইয়াৰ ওপৰত শাৰী থুকুচিছে, কোনোবাই পেটিকোট৷
  • বেণুধৰ ৰাজখোৱা
• অসমে নিজস্বতা হেৰুৱাব নোৱাৰে৷ নিজস্বতা ৰক্ষাৰ বাবে অসমে আৱশ্যক হ’লে পৃথিৱীৰ বিপক্ষেও থিয় দিব লাগিব৷ নহ’লে ক’ব লাগিব অসমত মানুহ নাই৷
  • মহাত্মা গান্ধী
• অসমদেশ প্ৰাকৃতিক সৌন্দৰ্যৰ ৰাণী, ভাষাৰ স্বৰ্গপুৰী আৰু তত্ত্বজ্ঞানৰ আকৰভূমি৷
  • ড° পৰীক্ষিত হাজৰিকা৷
• অসমৰ পৰ্বত-ভৈয়াম, পথাৰ, গছ-গছনি, চৰাই-চিৰিকতি সকলোৰে কণ্ঠত সুৰ আছে৷ সেই সকলোৱে যেতিয়া একেলগ হৈ গীত গাবলৈ আৰম্ভ কৰিব কাৰো সাধ্য নহ’ব সেই সমবেত কণ্ঠক হেঁচি ধৰি থাকিবলৈ৷
  • বিষ্ণুপ্ৰসাদ ৰাভা
• অসমক সকলো প্ৰকাৰে পৰা অতুলনীয় কৰি ৰাখিবলৈ হ’লে প্ৰতিজন অসমীয়াই নিজস্ব কৰ্তব্য পালন কৰি যাব লাগিব৷ সকলো অসমীয়াই মাৰবান্ধি, সমবেত চেষ্টা কৰিলেহে আমাৰ উন্নতি হ’ব৷ জাতীয় উন্নতিৰ নিমিত্তে লাগে ঐক্য, গভীৰ স্বদেশানুৰাগ আৰু স্বজাতি প্ৰেম৷
  • আনন্দ চন্দ্ৰ আগৰৱালা