যতীন গোস্বামী

নৃত্যাচাৰ্য যতীন গোস্বামী এগৰাকী ভাৰতীয় নৃত্যশিল্পী আৰু নৃত্য পৰিচালক। ভাৰতৰ শাস্ত্ৰীয় নৃত্যসমূহৰ ভিতৰত অন্যতম সত্ৰীয়া নৃত্যৰ প্ৰচাৰ আৰু প্ৰসাৰৰ বাবে গুৰু যতীন গোস্বামী বিশেষভাৱে জনাজাত। তেওঁ গুৱাহাটীত অৱস্থিত সত্ৰীয়া একাডেমীৰ প্ৰতিষ্ঠাপক সঞ্চালক আৰু বৰ্তমান উপদেষ্টা মণ্ডলীৰ সদস্য। তেওঁ সংগীত নাটক একাডেমীৰ সাধাৰণ পৰিষদৰ প্ৰাক্তন সদস্য আছিল। তেওঁ আলোক শিল্পী সংঘ নামৰ নৃত্য একাডেমী আৰু প্ৰাগজ্যোতি কলা পৰিষদ নামৰ সংস্কৃতিক সংস্থাৰ প্ৰতিষ্ঠা কৰিছিল। তেওঁ সত্ৰীয়া নৃত্যলৈ আগবঢ়োৱা অৱদানৰ স্বীকৃতি স্বৰূপে ২০০৪ চনত সংগীত নাটক একাডেমী বঁটা লাভ কৰিছিল। ২০০৮ চনত ভাৰত চৰকাৰে তেওঁক দেশৰ চতুৰ্থ সৰ্বোচ্চ অসামৰিক সন্মান পদ্মশ্ৰী প্ৰদান কৰে। ২০১৯ চনত সংগীত নাটক একাডেমীয়ে গুৰু যতীন গোস্বামীক ২০১৮ চনৰ বাবে একাডেমীৰ সৰ্বোচ্চ সন্মান সংগীত নাটক একাডেমী ফেল'শ্বিপ বা সদস্য ৰত্ন প্ৰদান কৰে। মহেশ্বৰ নেওগ আৰু ভূপেন হাজৰিকাৰ পিছত এই সন্মান লাভ কৰা তেওঁ তৃতীয়গৰাকী অসমীয়া।

উদ্ধৃতিসমূহ

1. সত্ৰীয়া সংস্কৃতি আমাৰ পৰম্পৰা। আমাৰ জীৱনত সত্ৰীয়া সংস্কৃতি নিত্য আৰু নৈমিত্তিক কৰ্মত সংপৃক্ত হৈ আছে।
2. ভাৰতৰ সকলো সংগীত পদ্ধতিত থূল বা ধাৰণা আছে। আচল কথা হৈছে তাৰ ব্যাকৰণ। ব্যাকৰণ শুদ্ধ হ'লে তাৰ পৰিৱেশন পদ্ধতি বেলেগ হ'লেও আপত্তি কৰিবলগীয়া নাই।
3. ভাওনাৰ লগত দেওধনী নাচৰ কোনো সম্পৰ্ক নাই, ইয়াৰ আদৰ্শৰো মিল নাই। ভাওনাত এইবোৰৰ সংযোগ কেতিয়াও গ্ৰহণযোগ্য নহয়।
4. অংকীয়া ভাওনাৰ ব্যাকৰণ মানি মাতৃভাষাৰ ভাওনা প্ৰদৰ্শন কৰিলে আপত্তি কৰিবলগীয়া নাই।
5. সত্ৰীয়া আৰু শংকৰী সংস্কৃতিৰ কিছু পাৰ্থক্য নিশ্চয় আছে।
6. এটা সংগীত ধাৰাৰ নিজস্ব শিক্ষণ পদ্ধতি যেতিয়ালৈকে স্থিৰ নহ'ব, তাৰ শিক্ষাদানো তেতিয়ালৈকে বেমেজালিময় হ'ব।
7. অসমৰ ব্যক্তি আৰু সমাজ জীৱনত শংকৰ গুৰুজনাৰ ধৰ্মীয় দৰ্শনৰ প্ৰভাৱ অপৰিসীম। এই ধৰ্ম দৰ্শন আদৰ্শৰ আধাৰতে প্ৰতিষ্ঠিত অসমীয়া জাতি।