বিপিনপাল দাস

বিপিন পাল দাস (জন্ম ১১ অক্টোবৰ,১৯২০ চন, মৃত্যু জুলাই ২০০৫) অসমৰ এগৰাকী শিক্ষাবিদ, ৰাজনীতিবিদ, বাগ্মী বৰ, সমাজ সংস্কাৰক। ১৯৪৫ চনত কাশী বিশ্ববিদ্যালয়ৰ পৰা পদাৰ্থ বিজ্ঞানত এম এচ চি পৰীক্ষাত উৰ্ত্তীণ হৈ কলকতাৰ আশুতোষ কলেজত পদাৰ্থ বিজ্ঞানত অধ্যাপনা কৰিছিল। ১৯৫৯ চনত দৰং কলেজৰ অধ্যক্ষ, গুৱাহাটী বিশ্ববিদ্যালয়ৰ একাডেমিক পৰিষদৰ সদস্য,কাৰ্য নিৰ্ব্বাহক সদস্য, ১৯৬৯ চনত কলেজ সমূহৰ পৰিদৰ্শক আছিল। ৰাজনীতিবিদ হিচাবে নিখিল ভাৰত সমাজবাদী পাৰ্টিৰ প্ৰধান সম্পাদকৰ দায়িত্ব পালন আৰু ১৯৭৪ চনৰ পৰা ১৯৭৭ চনলৈ কেন্দ্ৰীয় মন্ত্ৰীসভাত বৈদেশিক বিভাগৰ উপমন্ত্ৰী আছিল। লেখক,প্ৰৱন্ধকাৰ হিচাপে তেখেতৰ লেখনি সমূহ হ'ল - সমাজবাদৰ অভিমুখে,দ্য নাগা প্ৰব্লেম, সাক্ষী, সমাজবাদ আৰু ভাৰতীয় ৰাজনীতি, অন ৱল্ড এফেৰ্য়াছ, তুমি আৰু মই(কবিতা), প্ৰত্যাহ্বান(কবিতা), মাজ নিশা বেলিৰ কিৰণ(উপন্যাস), জীৱনৰ বাটে বাটে আদি।

উদ্ধৃতি সমুহ

জীৱনৰ বাটে বাটে

1. অকল বিদ্যা লাভ কৰাটোৱেই শিক্ষাৰ এক মাত্ৰ উদ্দেশ্য নহয়। নিজৰ জাতিটো, নিজৰ সমাজ খন চিনি পাব পৰাটোও শিক্ষাৰ অন্যতম মূল লক্ষ্য। সমাজখনৰ পৰা সাংস্কৃতিকভাৱে, মানসিকভাৱে আৰু আধ্যাত্মিকভাৱে বিচ্ছিন্ন হৈ লাভ কৰা উচ্চ শিক্ষাৰ কোনো মূল্য নাই বুলি মই ভাবো।
2. ছাত্ৰই ৰাজনীতিত অংশ লোৱাত মই বাধা দিবলৈ নিবিচাৰো, কিন্তু দলীয় ৰাজনীতি শিক্ষানুস্থানত প্ৰৱেশ কৰাটো মুঠেই সমৰ্থন নকৰো।
3. যদি সততা আৰু কৰ্মদক্ষতাৰ মাজত যিকোনো এটা বাছিলবলগীয়া হয় তেতিয়া মই সদায় সততাৰ পক্ষেহে ভোট দিম।
4. নীতি আৰু কাৰ্য্যসূচীৰ ওপৰত ভিত্তি কৰি আদৰ্শৰ মিল থকা দলৰ লগত মৰ্চা গঠন কৰা সমৰ্থন যোগ্য। কিন্তু অকল শাসকসকলক গাদীচ্যুত কৰিবলৈ নীতি-আদৰ্শ বাদ দি যাৰে-তাৰে লগত হাত মিলাবলৈ যোৱাটো বা সেইদৰে প্ৰতক্ষ বা পৰোক্ষভাবে যাৰে-তাৰে সমৰ্থন লৈ ক্ষমতাৰ গাদীত বহিবলৈ যোৱাটো নৈতিকতাহীন ৰাজনীতি বুলি মই ভাবো।
5. বেছিভাগ ৰাজনৈতিক নেতাক দুৰ্নীতিলৈ ঠেলি দিয়ে এফালে নিজৰ পৰিয়ালে আৰু আনফালে তেওঁৰ ঘনিষ্ঠ বন্ধু-বান্ধৱ আৰু ব্যক্তিগত সেৱাত নিয়োজিত বিষয়াবৰ্গই। এই দুটাৰ পৰা সুৰক্ষিত হৈ থাকিব পাৰিলে এজন ৰাজনৈতিক নেতা সহজে দূৰ্নীতিৰ কবলত নপৰে।
6. নীতিৰ দ্বাৰা পৰিচালিত ন্যায়নিষ্ঠ,নিৰপেক্ষ কামবিলাকৰ ফল সদায় মিঠা আৰু সৰ্বজনপ্ৰিয়।