ময়ূৰ বৰা

ময়ূৰ বৰা (জন্ম: ১৯৭০) হৈছে এজন অসমীয়া লেখক, চিন্তাবিদ আৰু সমালোচক। একবিংশ শতিকাৰ প্ৰথম দশকত বাতৰিকাকত আৰু আলোচনীৰ মাধ্যমেৰে প্ৰবন্ধ ৰচনাৰ দ্বাৰা সাহিত্যকৰ্মক সমৃদ্ধ কৰা অসমীয়া নতুনচাম লেখকৰ ভিতৰত এজন ময়ূৰ বৰা। তেওঁ অনুভৱৰ প্ৰতিধ্বনি, মাৰ্ক্সেই বজালে নেকি কমিউনিজমৰ মৃত্যুঘণ্টা, পথভ্ৰষ্ট হৈছে নেকি শংকৰ সংঘ, অসমীয়াত্বৰ জ্যোতি, পাহৰা মাণিক বিচাৰি, চিৰদিন অসমীয়া, অসমীয়াৰ স্বাভিমানৰ ৰূপৰেখা আদি কেইবাখনো গ্ৰন্থ ৰচনা কৰিছে।

উদ্ধৃতিসমূহ

চিৰদিন অসমীয়া

1. মাতৃভাষা আৰু মাতৃভূমিৰ প্ৰতি প্ৰশ্নাতীত একাত্মতা অনুভৱ নকৰা কোনো ব্যক্তিয়েই জাতিটোৰ বাবে অপৰিহাৰ্য নহয় বুলি ইতিহাসে আমাক শিকাই থৈ গৈছে।
2. বৌদ্ধিক আৰু সাংস্কৃতিক দিশত খিলঞ্জীয়া মানুহক স্বাভিমানী কৰি তুলিবলৈ হ'লে এটা বৌদ্ধিক আন্দোলনৰো প্ৰয়োজন।
3. দুজন তেজ-মঙহৰ মানুহ কিমান বহুমুখী প্ৰতিভাসম্পন্ন হ'ব পাৰে তাৰ নিদৰ্শন হৈছে শঙ্কৰ-মাধৱ।
4. মিছনেৰীসকলৰ সবল ভূমিকা অবিহনে অসমত অসমীয়া ভাষাৰ পুনৰুদ্ধাৰৰ আন্দোলন আৰু বহু হেঙাৰৰ সন্মুখীন হ'লহেঁতেন।
5. অসমীয়া ভাষিক জাতীয়তাবাদৰ খুঁটাটো এইবাবেই শক্তিশালী, কিয়নো ই পোত খাই আছে আমাৰ ইতিহাসৰ সেইটো অংশত যিটো অংশই অসমীয়া মানুহক বিনয়ী, মাৰ্জিত, সংস্কৃত হোৱাৰ উপৰি দিছে প্ৰয়োজনত অন্যায়-অবিচাৰৰ বিৰুদ্ধে প্ৰতিবাদ কৰাৰ ক্ষমতা আৰু সাহস।