বুদ্ধপ্ৰসাদ চেতিয়া

বুদ্ধপ্ৰসাদ চেতিয়া হৈছে অসমৰ এজন গণিতৰ অধ্যাপক, লেখক। তেওঁ অসম গণিত শিক্ষায়তনৰ সহপ্ৰতিষ্ঠাতা।

উদ্ধৃতিসমূহ

1. প্ৰকৃততে এজন গৱেষকৰ মূল্যায়ন তেওঁৰ দ্বাৰা প্ৰকাশিত গৱেষণা-পত্ৰৰ সংখ্যাৰ ওপৰত নহয়, তেওঁৰ দ্বাৰা প্ৰকাশিত গৱেষণা-পত্ৰৰ মানৰ ওপৰতহে কৰা হয়।
2. শিক্ষকতা জীৱনৰ অভিজ্ঞতাই মোক এটা ডাঙৰ শিক্ষা দিলেঃ এজন সুশিক্ষক হ’বলৈ হ’লে শিক্ষকজনৰ তিনিটা ন্যূনতম গুণ থাকিবই লাগিব – (১) পঢ়াবলৈ লোৱা বিষয়বস্তুৰ ওপৰত তেওঁৰ সম্পূৰ্ণ আয়ত্ত থাকিব লাগিব, (২) ছাত্ৰ-ছাত্ৰীসকলৰ প্ৰতি তেওঁ অত্যন্ত সহানুভূতিশীল আৰু মৰমিয়াল হ’ব লাগিব, (৩) পঢ়াই নিজে তেওঁ আনন্দ পাব লাগিব, পঢ়ুওৱাটো কেৱল পেচা হিচাপে নলৈ নিচা হিচাপে ল’ব লাগিব।
3. মই নিজে বিশ্বাস কৰোঁ যে অসম গণিত শিক্ষায়তনৰ নিচিনা সংস্থা এটাক ৰাষ্ট্ৰীয় পৰ্যায়ত প্ৰতিষ্ঠা কৰিবৰ কাৰণে কেৱল গণিত জনপ্ৰিয়কৰণৰ ওপৰতে জোৰ দি থাকিলেই নহ’ব। গণিতৰ গৱেষণা জনপ্ৰিয়কৰণৰ ওপৰতো জোৰ দিব লাগিব।
4. অফলাইন ছেমিনাৰ, কনফাৰেন্সত যোগদানকাৰীসকলৰ মাজত স্থাপিত হোৱা প্ৰত্যক্ষ সম্পৰ্কই এটা সুস্থ ফলপ্ৰসূ গৱেষণা বাতাবৰণৰ সৃষ্টি কৰাটো সম্ভৱ কৰি তোলে বুলি মই বিশ্বাস কৰোঁ।
5. মানৱ সভ্যতাৰ উৰ্ধগামী গতি গণিতৰ ক্ৰমবৰ্ধমান প্ৰসাৰ আৰু জটিলতাৰ লগত তুলনীয়। সেয়েহে গণিত সৃষ্টিৰ ব্যাপকতাক সভ্যতাৰ মাপকাঠী বুলি ক’ব পাৰি।
6. দৰাচলতে যুক্তিৰ প্ৰয়োগ মানৱ সভ্যতাৰ অগ্ৰগতিৰ ক্ষেত্ৰতে এক বলিষ্ঠ পদক্ষেপ।