দীনেশ চন্দ্ৰ গোস্বামী

ড॰ দীনেশ চন্দ্ৰ গোস্বামী (ইংৰাজী: Dinesh Chandra Goswami) অসমৰ এগৰাকী বিজ্ঞানী, সাহিত্যিক, নাট্যকাৰ আৰু ঘাইকৈ জনপ্ৰিয় বিজ্ঞান আৰু কল্পবিজ্ঞান, গল্প-উপন্যাস-অনাতাঁৰ নাটক আদিৰ লিখক। ড॰ গোস্বামীয়ে উত্তৰ-পূব বিজ্ঞান আৰু প্ৰযুক্তি প্ৰতিষ্ঠান, যোৰহাটৰ আঞ্চলিক গৱেষণাগাৰৰ বিজ্ঞানী আৰু সঞ্চালকৰ উপদেষ্টা হিচাবে অৱসৰ গ্ৰহণ কৰিছে। গোস্বামী ‘শৰাইঘাট অভিধান’ৰ সম্পাদক। তেখেতৰ ছদ্মনাম হৈছে দিগন্ত গোস্বামী।

উদ্ধৃতি

1. মই সদায় বিশ্বাস কৰিছোঁ যে কৰ্মৰ ফলতেই মানুহৰ প্ৰগতিৰ দিশটো উন্নীত হ’ব৷ কোনো ভাগ্য বা অলৌকিক বিষয়ে (জ্যোতিষ, বাস্তুশাস্ত্ৰ, ৰেইকী আদিৰ দৰে বিষয়বোৰ) মানুহক নিয়ন্ত্ৰণ কৰিব নোৱাৰে বা নিয়ন্ত্ৰণ কৰিবলৈ একোৱেই নাথাকে৷
2. কল্পবিজ্ঞানত কেৱল যে চলি থকা বিজ্ঞানেই থাকে, তেনে নহয়, সাম্ভাৱ্য বিজ্ঞানো থাকে৷ সাধাৰণতে এটা কাহিনী মানুহৰ মনৰ ভাৱ-অনুভূতি, সুখ-দুখ, হৰ্ষ-বিষাদ আদিক লৈ চলে৷ কিন্তু কল্পবিজ্ঞানত একোটা আৱিষ্কাৰ বা বিজ্ঞানৰ সামগ্ৰিক প্ৰক্ৰিয়াই কাম কৰে আৰু সেইটোৰ প্ৰভাৱ মানুহৰ জীৱনত, কাহিনীৰ নায়ক-নায়িকা বা চৰিত্ৰসমূহৰ ওপৰত কেনেধৰণৰ হ’ব, জীৱ-জন্তুবোৰৰ ওপৰত বা প্ৰকৃতিৰ ওপৰত কেনে প্ৰভাৱ পৰিছে, তাক দেখুৱায়৷ সমান্তৰালভাৱে কল্পবিজ্ঞানত ভৱিষ্যতৰ বিজ্ঞানৰ বাবে সম্ভাৱনাৰ কথা দেখুওৱা হয়৷ এই সম্ভাৱনা যুক্তি-যুক্ততাৰ আধাৰত হ’ব লাগিব৷ কল্পবিজ্ঞানে বিজ্ঞানৰ হ’ব পৰা প্ৰগতিৰপৰা মানুহৰ কেনেধৰণৰ লাভ হ’ব, সেয়া দেখুৱাই দিব পাৰে৷ গতিকে এনে সাহিত্যৰ যথেষ্ট প্ৰয়োজন আছে৷
3. মই ভাবোঁ, ঈশ্বৰৰ ধাৰণাটোৱেই যিহেতু এটা অমূলক আৰু বিভ্ৰান্তিকৰ ধাৰণা, গতিকে সেই ধাৰণাটো বাদ দিব পাৰিলে ভাল৷ আৰু আমি কেৱল মানবীয়তাৰ কথা সৰুৰেপৰা শিকাবলৈ চেষ্টা কৰা ভাল৷ তেতিয়াহে আমাৰ জাতিটোৰ লগতে দেশ, বিশ্বৰ লাভ হ’ব৷

পৰিৱেশৰ বাবে সামান্য কাম

1. ধুনীয়া পৃথিৱীখন ধুনীয়া কৰি ৰাখি, আগতকৈয়ো ধুনীয়া কৰি আপোনাৰ সন্তানসকলক উপহাৰ দি যাওক৷
2. মানুহৰ আঘাততে পৃথিৱী আৰু পৰিৱেশ অসুস্থ হৈ পৰিল৷
3. যিসকলে বাহিৰত পৰিৱেশ ৰক্ষাৰ বাবে অতি উদাৰভাবে আৰু আন্তৰিকতাৰে বক্তৃতা দিয়ে আৰু যিসকলে নিজৰ আৰু ৰসায়নিক বা জীৱবিজ্ঞানৰ গৱেষণা পৰিৱেশ সুহৃদ “সেউজীয়া পদ্ধতি’’ বুলি দাবী কৰে,- তেখেতসকলেও কোৱাৰ্টাৰ্ছলৈ আহিয়েই কৰা প্ৰথম কামৰ ভিতৰত আছিল তাৰ গছ-গছনি কটাই দিবলৈ অনুৰোধ কৰি অতি যুক্তিযুক্ততাৰে টোকা লিখাটো৷