হিমন্ত বিশ্ব শৰ্মা

হিমন্ত বিশ্ব শৰ্মা

হিমন্ত বিশ্ব শৰ্মা (ইংৰাজী: Himanta Biswa Sarma; জন্ম: ১ ফেব্ৰুৱাৰী, ১৯৬৯) হৈছে অসমৰ এগৰাকী ৰাজনীতিবিদ তথা অসমৰ বৰ্তমানৰ মুখ্যমন্ত্ৰী। ১৯৮৫ চনত কামৰূপ একাডেমীৰ পৰা মেট্ৰিক পাছ কৰাৰ পিছত শৰ্মাই উচ্চ শিক্ষাৰ বাবে কটন কলেজত নামভৰ্তি কৰে। তেওঁ ১৯৯১-৯২ত কটন কলেজ ছাত্ৰসন্থাৰ সাধাৰণ সম্পাদক আছিল। তেওঁ কটনৰ পৰা ৰাজনীতি বিজ্ঞানত ১৯৯০ চনত স্নাতক আৰু ১৯৯২ চনত স্নাতকোত্তৰ পৰীক্ষা পাছ কৰে। শৰ্মাই গুৱাহাটীৰ চৰকাৰী আইন মহাবিদ্যালয়ৰ পৰা আইনৰ স্নাতক আৰু গুৱাহাটী বিশ্ববিদ্যালয়ৰ পৰা ডক্টৰেট ডিগ্ৰী লাভ কৰে।

উদ্ধৃতিসমূহ

1. বিভিন্ন জাতি-জনগোষ্ঠীৰ সুপ্ৰাচীন পৰম্পৰা আৰু আচাৰ-নীতি আদিয়েই হৈছে আমাৰ বৈভৱ।
2. ভৱিষ্যতৰ বাহক শিক্ষাৰ্থী সকলক সফলতাৰ দিশত আগবঢ়াই নিবলৈ প্ৰতিজনে সৰ্বতোপ্ৰকাৰে অনুপ্ৰাণিত কৰিব লাগিব।
3. ভাৰতীয় সভ্যতাৰ মহান মনীষীসকলৰ জীৱন দৰ্শনৰ পৰা যুৱপ্ৰজন্ম উদ্বুদ্ধ হোৱা উচিত।
4. তথ্য-প্ৰযুক্তিৰ লগতে মনৰ উদ্যমৰে এটা কাম অতি সহজেই কৰিব পাৰি।
5. নিজৰ কৰ্মক বোজা বুলি ভবাতকৈ কামটো উপভোগহে কৰিবলৈ শিকিব লাগে।
6. ব্যক্তি নিৰ্মাণেই হৈছে ৰাষ্ট্ৰ নিৰ্মাণৰ আধাৰ।
7. পাৰহৈ যোৱা ক্ষণ আৰু দুনাই উভতি নাহে। আমাৰ দায়িত্ব সমূহ সময়মতেই সমাধা কৰিব লাগিব।
8. মানৱীয় প্ৰমূল্যবোধসমূহে আমাক পূৰ্ণ মানুহ কৰি তোলে।
9. মানৱতাই কেৱল মানুহৰ সেৱা-শুশ্ৰূষাকেই নুবুজায়। নিৰীহ প্ৰাণীকুলৰ মাজতো সমভাৱ পোষণ কৰিব পাৰিলেহে প্ৰকৃত মানৱতাবোধৰ পৰিচয় পোৱা যায়।
10. সৰু সৰু চিন্তাৰ পৰাই সম্ভাৱনাৰ অযুত দুৱাৰ মুকলি হয়।
11. আমাৰ নিজৰ নিজৰ জাতিৰ যেতিয়া নৱজাগৰণ হ'ব, নিজৰ নিজৰ জাতিৰ যেতিয়া বিকাশ হ'ব, তেডিয়া আমি বহল সমাজখনৰ প্ৰতিও আমাৰ দায়িত্ব পালন কৰিব লাগিব।
12. মাতৃভাষাৰ প্ৰতি থকা অম্লান প্ৰেমেই বিশ্ব মানচিত্ৰত এটা জাতিক সগৌৰৱে জীয়াই থকাৰ সাহস আৰু প্ৰেৰণা যোগায়।
13. মঞ্চ বিহু কৰিলেও সাত বিহুৰ পৰম্পৰা ৰক্ষা কৰাটো আমাৰ দায়িত্ব।
14. এটা জাতি নিজৰ ভৰিৰ ওপৰত থিয় হ'বলৈ প্ৰথম প্ৰয়োজন এক শৈক্ষিক কাঠামো, প্ৰয়োজন জ্ঞান আৰু প্ৰজ্ঞাৰে উজ্জীৱিত এটা নতুন প্ৰজন্ম।
15. জীৱনত যেতিয়া আমি ক'ৰবাত কেতিয়াবা সফলতা পাওঁ, তাৰ কৃতিত্ব কেৱল নেদেখাজনৰ আশীৰ্বাদ আৰু পিতৃ-মাতৃৰ পৰিশ্ৰম।
16. সুশিক্ষাৰে শিক্ষিত হৈ নৱপ্ৰজন্মৰ জিজ্ঞাসা, কৌতূহল আৰু বিশ্লেষণাত্মক দৃষ্টিভংগী প্ৰৱল হৈ উঠিব লাগিব৷
17. নিষ্ঠাসহকাৰে কাম কৰক, নিষ্ঠাৰ বহুত মূল্য আছে। আমি নতুন চিন্তাৰে, কামেৰে মিলি নতুন অসম এখন সৃষ্টি কৰিম।
18. সুস্থ-সবল নৱপ্ৰজন্ম দেশ এখনৰ উত্তৰণৰ প্ৰধান ভেটি। সম্ভাব্য ৰোগৰ পৰা শিশুসকলক সুৰক্ষা প্ৰদান কৰিবলৈ টিকা প্ৰদান কৰাটো আমাৰ সকলোৰে অন্যতম কৰ্ত্তব্য।
19. ছাতি থাকিলে বৰষুণৰ পৰা আমি ৰক্ষা পাওঁ৷ পিতৃ-মাতৃ আমাৰ জীৱনৰ সেই স্থায়ী ছাতিটো৷ যেতিয়ালৈকে পিতৃ-মাতৃৰ আশীৰ্বাদৰ ছাতি জীৱনৰ ওপৰত থাকে, আমাক কোনো বৰষুণে তিয়াব নোৱাৰে৷