বনফুল (গ্ৰন্থ)

বনফুল যতীন্দ্ৰ নাথ দুৱৰা ৰচিত বনফুল কবিতাপুথিখন সাহিত্য অকাডেমি বঁটা প্ৰাপ্ত প্ৰথম অসমীয়া গ্ৰন্থ।

উদ্ধৃতিসমূহ

• কোনোৱে দূৰতে চায় কোনোৱেবা চুই যায়
  চেনেহ কণিকা বুলি কৰোঁ তাকে ভুল।
  সপোন আঁতৰি গলে দিঠকে জনাই দিয়ে
  বাটৰ কাষৰ মই বননিৰ ফুল।
• মোৰ বাবে তুমি
  নুৰুবা মালতী ফুল,
  জীৱনত কিয়
  মিছাতে বঢ়োৱা ভুল?
  ফুলো নুফুলিব
  মৰহিব গছ পুলি,
  ফুলিলেও চাবা
  ঢোপাতে সৰিব কলি।
• সোণৰ প্ৰদীপ সুগন্ধি তেলেৰে
  ধনীয়ে শৰাই ধৰে;
  প্ৰাণৰ চাকিত শলিতা জ্বলাই
  অজলাই পূজা কৰে।
• সোণালী কিৰণ সানি,
  পুৱাতেই পাখি মেলি,
  উৰি গ'ল দুয়োটিয়ে সৰগ ধিয়াই;
  আন্ধাৰ নামিল আহি,
  লগৰী নাহিল চাপি
  কোনে জানে কেনি উৰে বাট হেৰুৱাই।
• মোৰ চিৰ জনমৰ
  চিৰ চেনেহৰ
  যত অপূৰণ আশা
  হয়তো কাৰোবাৰ মধু পৰশত
  পাব কেতিয়াবা ভাষা।